Esta próxima fin de selmana, el sábadu 20 de xineru, da empiezu una nueva Ronda de Teatru per Carreño, yá na so XIII edición. Van ser 10 tardes de teatru, tonada y monologuismu.

La presentación d'esti programa cultural añal celebróse esta mañana nel Salón de Plenos del Conceyu de Carreño condució la mesma'l director del Centru Cultural Teatru Prendes, Alain Fernández. Hubo nutrida presencia de representaciones de les entidaes vecinales y teatrales participantes qu'arroparon a la Conceyala de Cultura y Presidenta del Patronatu Cultural, Cecilia Tascón, na presentación de la nueva ronda.

Les rises, lloros, amoríos, alcuentros, desencuentros, reconciliaciones,… van percorrer les parroquies del Conceyu pa rematar el xueves 3 de mayu na comunidá terapéutica de Proyecto Hombre en La Piedra-Candás.

Estes representaciones teatrales ñacen del alcuerdu de collaboración ente'l Conceyu de Carreño y trés asociaciones asturianes: Federación de Grupos de Teatru Amateur d'Asturies, FETEAS; l'Asociación d'Interpretes del Cantar Asturianu, AICA; y l'Asociación Cultural del Cantar Asturianu Narcea. Amás tamién collaboren col  Ayuntamientu entidaes teatrales del Conceyu, el Grupu de Teatru Xana”  de Perlora y “Les Ayalgues” de Carreño. 

“Nesta XIII edición de la Ronda de Teatru per Carreño como novedá vamos poder esfrutar de los y les premiaes na última edición de los Premios Aurora qu'añalmente concede'l Salón de Teatru Costumista de Candas. Asina por casu vamos empezar en Llorgozana col grupu de teatru al que pertenez Yolanda Serrano, premio Aurora meyor actriz o el “GT Xana” de Perlora va representar la obra “Xuacu el faraolete” n'Ambás pol que consiguieron el premiu  a la meyor dirección (Rosana Muñoz) y meyor maquillaxe y vestuariu; pasando por el “GT La Farola” premiu del públicu a la meyor función y meyor actor Chema Puerto pola obra “La maxa de la primer vez”; Nacho Fernández del “GT de Valdesoto” volverá metese nel so papel de la obra “El Sexu de los Anxelos” pol que consiguió el meyor actor secundariu; y Manuela Mier , meyor actriz secundaria por “Divorciu de Grupu” de “GT Refaxu” va volver al so personaxe. Tou nun intentu de llevar el meyor teatru a tolos rincones del Conceyu” señaló la conceyala de Cultura.

Toles representaciones van tener llugar a les 19 hores nos Centros d'Iniciativa Rural de les Parroquies. La entrada va ser gratuita hasta completar aforu. 

La primera de la funciones va tener llugar nes escueles de Llorgozana esti sábadu, 20 de Xineru,  a partir de les 19 hores, cola obra “Coses del más allá” del Grupu de Teatru Santa Bárbara” de Llaranes y colos monólogos de “Les Ayalgues”.