Tarde teatral en Llorgozana

Esti sábadu 20 de xineru, a les 19 h.  arrincó na parroquia de Llorgozana la XIII edición de la Ronda Teatral per Carreño. Nesta primer función, intervinieron el Grupu de Teatro Santa Bárbara de Llaranes cola escenificación de “Coses del más allá” y “Les Ayalgues” de Carreño colos sos monólogos.
 “Les Ayalgues” son un grupu de muyeres del conceyu de Carreño,  qu'en participando nun taller de iniciación al teatru dientro del programa rexonal “Tiempu propiu”, afayaron el so interés nes artes escéniques y solicitaron a la Conceyalía d'Igualdá l'impulsar una actividá teatral pa elles nel conceyu. Asina empezaron un taller de teatru cola profesional asturiana Gemma de Luis. D'ende surdió la creación del so grupu de teatru. Na actualidá siguen ensayando na Casa d'Alcuentros de Candás y tán somorguiaes na preparación d'una nueva obra teatral “El secreto de les marañueles”. Un testu  de José Ramón Oliva que van estrenar el próximu branu nel Salón de teatru costumista de Candás. Esta tarde, dos de Les Ayalgues escenificaron unu de los sos sketch cómicos que lleva por títulu “Té para dos”.

De siguío,  Santa Bárbara de Llaranes, so la dirección de Carmen Campo, representó la obra “Coses del más allá” que la so autora ye la mesma Carmen. Esta obra foi estrenada nel Teatru Prendes de Candás, va dos años, nel salón de teatru costumista, consiguiendo con ella'l premiu Aurora al meyor decoráu y llume.

Esti grupu nació nel 2001 coincidiendo cola xornada solidaria que se llevó a cabu nel Barriu de Llaranes (Avilés) pa consiguir fondos pa proyectos de cooperación en Guatemala. Nun principiu, les actuaciones namá yeren pal vecinderu de la zona pero pasu a pasu fueron faciendo camín hasta formar parte de la escena asturiana y ser una compañía bien demandada y quería pol públicu.

La obra representada “Coses del más allá”  ye una obra costumbrista asturiana, con elementos satíricos y picarescos. Nella los personaxes van ser capaces d'urdir delles tretes, sacaes de la picaresca popular asturiana venceyaes cola relixón y la hechicería. Y que pa salir d'eses situaciones van tener qu'usar tol so inxeniu.


La próxima función de teatru d'esta Ronda va ser el próximu sábadu, 27 de xineru na parroquia de Carrió, nes sos antigües escueles nel barriu d'El Bandín. A as 19 hores van actuar el GT Rosario Trabanco de Xixón cola obra “La Magdalena y San Roque” y de nuevu van volver a escena con monólogos “Les Ayalgues” de Carreño.