El Conceyu de Carreño axudicó, tres el correspondiente procesu de llicitación, les obres d'ampliación de la cai Inocencio Rodríguez Solís y de meyora de l'accesibilidá ente les cais Xovellanos y Severo Ochoa. La zona oxeto d'actuación atópase destinada provisionalmente a aparcamientu, esperando'l momentu en que se formalice la edificación que fai posible el planiamientu sobro parte de los terrenos y urbanícese la Zona Verde Pública axacente. La urbanización prevista ye dafechu compatible col planiamientu vixente.

Ye una actuación contemplada con cargu al remanente que foi aprobada polos grupos políticos PSOE y SOMOS Carreño. Nesti procesu de llicitación participaron 4 empreses resultando axudicataria de les mesmes la empresa Obras, Servicios y Construcciones del Principado, S.L. (OSYCO), por un importe de 136.009,57 € IVA incluyíu.

“Trátase de la execución de les obres na redolada del aparcamientu provisional esistente ente les cai Severo Ochoa, Xovellanos y Inocencio Rodríguez Solís de Candás, necesaries pa completar la urbanización d'un tramu ésta última, d'aprosimao 30 m. de llargor, dotándola d'una sección uniforme; según p'ameyorar l'accesibilidá ente les primeres, ente les qu'esiste una notable diferencia de cota” – espresó Gabriel Rodríguez, edil d'urbanismu.

“Anguaño l'ámbitu nun tien completada la so urbanización, perteneciendo la mayor parte del mesmu a terrenos llograos pol Conceyu como cesión obligatoria nel desenvolvimientu de la Unidá d'Execución nº 21, delimitada nes anteriores Normes Subsidiarias.  Esti déficit na urbanización fai que la cai Inocencio Rodríguez Solís tenga na actualidá una sección irregular, que resulta bien escasa nel tramu indicáu, enzancando'l tráficu de vehículos, el so aparcamientu y la continuidá de los percorríos piatonales, polo que ye voluntá municipal acometer la urbanización del tramu de cai.  Pa ello proyectóse la implantación d'una cera de 1,50 m. d'anchu, previa preparación del terrén y execución de los elementos de contención y zarru que resulten necesarios, garantizando la continuidá de les redes y servicios esistentes nesa marxe de la cai nos tramos en qu'ésta s'atopa totalmente urbanizada” – esplicó'l conceyal.

“Igualmente proyéctase habilitar dos percorríos piatonales, al traviés de los terrenos utilizaos como aparcamientu provisional, que faciliten l'accesibilidá ente les cais Severo Ochoa y Xovellanos.  Concretamente proyéctase la execución d'una escalera y de una rampla que salven les diferencies de cota ente dambes cais” – prosiguió'l conceyal.       

Les obres de construcción van empezar cola adopción de les primeres midíes de seguridá: delimitación y zarru del ámbitu, instalación de caseta/s d'obra y conexón de los servicios necesarios pa ésta/s: suministru d'agua, saneamientu y suministru eléctricu, col so correspondiente cuadru de protección.

De primeres, va procedese al desmontaje y retirada de los elementos de fábrica que puedan interferir col desenvolvimientu de les obres. L'horru esistente nel ámbitu tendrá de ser desmontáu y retiráu primeramente, pa la so rehabilitación y reubicación na parcela de los güertos municipales. De siguío, va procedese a la roza y llimpieza de la vexetación esistente na zona de les obres, retirando capa de tierra vexetal qu'esista y atropándola pal so posterior reutilización.

Pa l'ampliación de la sección de la cai Inocencio Rodríguez Solís va procedese al corte del actual pavimentu en visu a poder enllazar limpiamente cola calzada actual la obra que s'acomete. Tamién se va llevantar el bordiellu y van baltase les soleras de les ceres que resulten incompatibles cola nueva urbanización.

Darréu va procedese, per medios mecánicos, al caxiáu de les superficies d'actuación, tanto pa l'ampliación de la cai, como pa la execución de la escalera y rampla proyectaes, según a la escavación de les cabianes pa la cimentación de los elementos de fábrica que van sirvir de contención pa éstes.

Les cimentaciones de los elementos de fábrica van executase en formigón armáu, por aciu zapates corríes escéntriques. Los murios, tamién de formigón armáu, van quedar vistos pola so cara esterior. La coronación de cada muriu alzaráse unos centímetros sobro la rasante de la cera o terrenal colindantes.

Sobro les zones a urbanizar va estendese, va nivelar y va amacerar una base de zahorra artificial. Nes zones pa les que se proyecta, va disponese un nuevu bordiellu de formigón prefabricáu que va definir la nueva alliniación esterior de la cera. Sobro la base de zahorra estendida, nivelada y amacerada de la zona; va disponese una solera de formigón, con malla electro-soldada que va tener xuntes de dilatación, sellaes convenientemente por aciu productos bituminosos.  Na zona de la nueva cera'l pavimentu a utilizar polo xeneral va ser a base de baldoses de terrazo en relieve, similares a les esistentes, y dimensiones, recibíes con morteru de cementu y rellenaes les sos xuntes con llechada de morteru de cementu. 

Va dotase a la rampla, a les escaleres y a los zunchos/bordiellos de coronación de los elementos de fábrica que sofiten les cais, de barandielles executaes  conforme a lo dispuesto nos Decretos correspondientes.

Primeramente a la execución de la base de zahorra de los distintos firmes, van disponese les canalizaciones de saneamientu y d'allumáu públicu.  Les canalizaciones de saneamientu van ser de PVC, serie texa, soterraes y asitiaes sobro cama de sable, que van acometer a la rede xeneral colector xeneral acordies con el trazáu, les rimaes y los elementos de recoyida que se van reflexar nos planos correspondientes. 

La canalización d'allumáu va consistir en doble tubu de PVC corrugáu sobro la que va escurrir el cableaxe necesariu pa enllazar cola rede esistente na redolada del ámbitu. Prevese asina mesmu la rede de puesta a tierra correspondiente. va executase la obra civil necesaria pa instalación de les columnes y balices proxectaes. Tola instalación eléctrica va realizase según la normativa vixente.