L'Ayuntamientu de Carreño, tres el correspondiente procesu de llicitación, axudicó'l contratu menor pa la realización d'estudiu técnicu previu pa encarar la remodelación del Paséu Marítimu de Candás. Un estudiu técnicu que va analizar exhaustivamente la intensidá de tráficos, sitiación del sosuelu y la base del pavimentu esistente. 

“Trátase d'un asesoramientu técnicu complementariu, al qu'empresten los técnicos de la Oficina Técnica Municipal, que contempla la redacción d'estudiu, tres les reconocencies y analises oportunos, nel que se detecten y diagnostiquen les patoloxíes y defectos materiales o funcionales que pudieren esistir nel Paséu Marítimu qu'escurre entre Candás y Perán (Perlora). Con esti informe integral vamos tener los datos necesarios pa plantegar alternatives posibles d'actuaciones futures na zona, dexando asina a la Corporación Municipal disponer del conocencia precisa pa tomar decisiones n'orde a encetar con ésitu'l diseñu d'una futura remodelación del mesmu” - señaló Gabriel Rodríguez, edil d'urbanismu.

El mentáu estudiu va contemplar, a lo menos,  les siguientes cuestiones:

·Analís del Proyectu de Recuperación de la Fachada Marítima de Candás, redactáu en Noviembre de 2005 y desenvueltu pola entós Conseyería de Mediu Ambiente, Ordenación del Territoriu ya Infraestructures.

·Comprobación del grau de cumplimientu del citáu proyectu na execución de les obres, fundamentalmente no referente a los aspeutos que pudieren incidir na situación actual del pavimentu.

·Llogru de datos xeotécnicos, sondeos o otra información que concrete la resistencia del terrén nel ámbitu, la esistencia de corrientes soterrañes d'agua, o cualesquier otra circunstancia que pudiera influyir nel comportamientu del terrén, del firme o del pavimentu.

·Reconocencia y diagnósticu de les patoloxíes detectaes na pavimentación executada nel ámbitu del estudiu, en relación coles resultancies llograes nos apartaos anteriores.

·Estudiu del tráficu que soporta la vía pública.

·Ellaboración de conclusiones y propuesta d'alternatives materiales, económiques y de diseñu para una futura remodelación del Paséu Marítimu.

“Nesti procesu de llicitación participaron trés empreses, axudicándose finalmente a Avanzatech Dessarrollo, Ingeniería y Servicios, S.L. por importe de 5.626,50 euros IVA incluyíu. El gastu va dir con cargu a la partida 1532 611.07 “Víes Públiques” del vixente Presupuestu Municipal” - concluyó'l conceyal.