"El gobiernu local trabaya con celeridad y lleva dos años atopando la posa na actitú de los grupos de la oposición. El PP sigui enredando y bloquiando l'aprobación del planiamientu urbanísticu pindiu en Perlora y Carrió"–respondió Gabriel Rodríguez, conceyal d'urbanismu del Conceyu de Carreño, a les acusaciones realizaes en prensa rexonal pol voceru del Partíu Popular respectu al PGO. 

"Los alcuerdos en materia d'ordenación urbanística fueron bloquiaos permanentemente pola oposición. Realicemos propuestes y del restu de grupos municipales solo recibimos negatives parapetadas na supuesta valoración vecinal. Convien recordar que la situación en Carrió y Perlora tien el so orixe na aceptación per parte del equipu de gobiernu de dellos allegamientos de les asociaciones vecinales. La oposición optó (como vien siendo habitual) pel camín más fácil, él non porque non. Fueron incapaces de plantegar alternatives a les propuestes del gobiernu. Poro, va ser el Partíu Popular quien va tener qu'esplicar la so negativa a aprobar el testu refundíu y el so arrenunciu a proponer alternatives"–esplicó'l conceyal d'urbanismu.

"Nun ye de recibu qu'esixan un ritmu que son incapaces de siguir y muncho menos, que  pidan que pongamos les piles cuando paez que dan por escosa una llexislatura qu'entá tien percorríu. Tamos deseyando conocer l'alternativa qu'embaraxa'l PP pa contribuyir al desenvolvimientu del planiamientu urbanísticu en Carreño, porque'l gobiernu local ta dispuestu a valorala dende va meses. Emplazamos al voceru del Partíu Popular a que'l presente na próxima comisión d'urbanismu"–concluyó Gabriel Rodríguez.