La Biblioteca Municipal “Carlos
González Posada” de Candás recibió a lo llargo de 2017
un 5,53% más de visites que nel 2016, llegando a
les 47.984 visites. Esti datu vien de la suma del
númberu de préstamos, el de sesiones d'internet, el d'asistentes a
actividaes y el de llectores y llectores en sala.
Na actualidá, el centru pasó de los
2.822 socios y socies a los 3.030, lo que supon una medría de 7.37%
respectu al añu anterior. Tamién s'amontaron los fondos disponibles
en 544 documentos, llegando a los 22.928 volumes de
llibros, cd de música y películes en formatu dvd.
Cuando falamos de datos, de les 47.984
visites que tuvo la Biblioteca Municipal 15.305 pertenecen al
préstamu de llibros, cd más dvd. Dixebrándolos por rangos
d'edá, el préstamu de llibros y audiovisuales a persones adultes
supunxo'l númberu de 8.652 ente que el de llibros y audiovisuales
infantiles supunxo'l númberu de 6.653.
“La Biblioteca convirtióse non yá
nun centru de llectura y consulta, si non qu'a día de güei, y
gracies al esfuerzu de trabayadores ye un centru cultural de
referencia nel conceyu nel qu'amás de les actividaes básiques d'una
biblioteca como préstamos de llibros, cd´s, sala d'estudiu y
consulta, realícense actividaes culturales como talleres infantiles,
cuentacuentos, club de llectura, conferencies, esposiciones, visites
escolares,…etc ” señaló Cecilia Tascón-Conceyala de
Cultura.
Toles selmanes, mientres el cursu
escolar, realícense 4 talleres al mes, estremándose estos según la
edá de participantes, En cada unu d'ellos, son 15 componentes
qu'esfruten d'esta iniciativa. A esto hai que suma-y el taller de la
hora del cuentu, les visites d'escolares, el concursu añal de
marca-páxines o les actividaes del Día del llibru, ente otres.
Estes actuaciones supunxeron la participación de 935 persones
menores d'edá.
Ensin escaecer tampoco les actividaes
empobinaes al públicu adultu, fueron 983 persones les qu'asistieron
al club de llectura, alcuentros con otros clubes, como col del
conceyu de Castropol, conferencies, recitales de poesía,
presentación de llibros, esposiciones,…
Tocantes a les persones qu'utilicen el
centru como sala d'estudiu, usuarios y usuaries de los servicios
telemáticos, prensa diaria y revistes, el númberu xubió a 28.832
persones.
“La suma total de los préstamos,
l'usu d'internet, les persones asistentes a les actividaes que
desenvolvemos, tanto adultes como infantiles, el llectores en sala
supunxo esa medría d'un 5.53% más que nel 2016, llegando
a casi les 48.000 visites. Cifra de la que'l personal de la
Biblioteca Municipal sentímonos bien arguyosos lo qie nun fai más
que reafitanos na nuesa idea de que les biblioteques nun tán
n'absolutu en decadencia, y que cuando s'invierte nelles, realícense
actividaes d'animación a la llectura y ufiértense servicios que
reclama la sociedá, calteniendo non yá el númberu d'usuarios y
usuaries. sinón qu'esi númberu amóntase –comentó
Carmen Dintén, Bibliotecaria Municipal.
Na actualidá esti equipamientu
municipal ta atendíu por 4 persones qu'integren la so plantiya.