El próximu vienres, 23 de marzu a les 18:45 h., va tener llugar nel Centru d'Escultura de Candás, Muséu Antón inaugura la esposición “La parte mínima del todo” de Carmen González.
Esta esposición ta constituyida poles últimes creaciones plástiques que l'artista realizó gracies a una estancia d'investigación artística en Crawford College of Art & Design en Cork, Irlanda. Carmen plantega la esposición como una obra d'instalación pictórica que supon una estensión espacial de la pintura más allá de les llendes bidimensionales del cuadru y que pol so calter tridimensional avérase dende la pintura contemporánea a conceutos escultóricos y d'instalación artística.
L'oxetivu d'esta obra ye crear una relación non solo visual, sinón sensible coll espectador al traviés d'una pintura que dialoga col espaciu compartíu. Les once instalaciones qu'integren esta esposición fueron creaes con más de mil unidaes de papel tratáu y pintáu con oliu de forma cilíndrica y ente 10 y 14 cm. d'altu, dalgunes preséntense nel suelu o sobre peanas de diversos altores.
A partir de l'acumuladura d'estes unidaes y la so distinta ordenación, la pintura espandida dialoga col espaciu nel que s'alluga y tamién col espectador, les formes y les relaciones de color varien cuando movemos en redol a elles creando ritmos cambiantes. Na esposición tamién s'amuesa una serie de cuadros, de distintos formatos, realizaos n'oliu sobro llenzu o papel qu'utilicen los recursos cromáticos y espresivos, como ritmos y fluxos de color, emplegaos nes obres anteriores.
Carmen González, llicenciada en Belles Artes y doctora n'Estética y Teoría del Arte, imparte docencia na área de pintura de la Facultá de Belles Artes de la Universidá de Salamanca.
Dende l'añu 1999 participó en numberoses esposiciones tanto colectives como individuales. Tamién realizó diverses estancies d'investigación plástica en delles ciudaes como, Weimar, Chicago, Seúl, ente otres.
La esposición, va poder ser visitada nel Centru d'Escultura de Candás, Museo Antón hasta'l 6 de mayu. L'horariu de visites ye de martes vienres de 17:30 a 19:30 h., sábados, domingos y festivos de 12 a 14 h. y de 17:30 a 19:30 h. La entrada ye gratuita.
Albandi
