Ye un camín públicu que deriva de la Carretera de Villar Enriba a Tabaza na parroquia de Tamón. Les obres que se tán realizando, dende la Conceyalía de Mediu Rural de Carreño, allugúense nel camín identificáu nel inventariu de víes públiques del conceyu de Carreño col códigu C-861 (Camín de La Tabla-La Güelga) na parroquia de Tamón. Pretende reparase el citáu camín, que tien un llargor averáu d'unos 1.346 metros. Na actualidá como firme dispon d'una sub-base d'escoria.

Pa la execución d'estes obres el Conceyu de Carreño solicitó ufiertes a 5 empreses, axudicándose les mesmes, tres la llicitación correspondiente a la presentada por AGLOASTUR,S.L. por un importe de 34.019,15 €. IVA incluyíu.

“L'arreglu del camín respuende a pidimientos del vecinderu de la parroquia, dando accesu a numberoses finques y montes maderables. El camín, na actualidá nun dispon de cunetes nin otros elementos de drenaxe, motivu pol qu'en momentos de fuerte avenida l'agua arroya arrastrando tierres. Lo que provoca un mayor deterioru” - esplicó Manuel Noceda, Conceyal de Mediu Rural.

“Optemos por una solución d'afirmáu mista, por aciu llosa de formigón llixeramente armáu nos tramos más pindios y firme de zahorra artificial nel restu, instalando cunetes y sangraderes nos puntos fayadizos pa evitar l'acción enchente de l'agua, evitando que como asocede agora fórmense rodaes por arrastre del material de rodadura” esplicó'l Conceyal.

“Pa la pavimentación proyectada, nel casu del formigón, va utilizase formigón de consistencia secu-plástica llixeramente armáu en formación de llosa n'espesura de 16 cm sofitada sobro la sub-base actual. Primeramente va debese faer una serie de trabayos previos de llimpieza, perfiláu de la plataforma y encaxe de los tramos de cuneta, lo mesmo que de la instalación sangraderes y accesos a finques. Asina mesmu pa los tramos nos que ta proyectáu l'usu de zahorra, esta va ser artificial” - añedió'l conceyal.

“El problema deriváu de la falta de drenaxe va quedar solucionáu cola instalación d'una cuneta con bordiellu cuneta en “V” fabricaes en formigón llixeramente armáu, pal drenaxe llonxitudinal. Pal drenaxe tresversal va solucionase por aciu la construcción de sangraderes de formigón llixeramente armáu” - concluyó Manuel Noceda.