Énte les declaraciones realizaes a los
medios de comunicación pola ex edil de Carreño, na actualidá
diputada de FORO, Carmen Fernández, en relación a la publicación
nel BOPA del entamu del espediente de baltadera d'unes viviendes
asitiaes en Perán, el conceyal d'urbanismu y voceru del gobiernu
local socialista nel Conceyu de Carreño, Gabriel Rodríguez,
manifestó que “les sentencies xudiciales a les qu'alude la
diputada nun s'incumplieron en nengún casu, ello ye que la intención
del gobiernu siempres foi la de recoyer el fallu de la sentencia,
qu'envalora parcialmente'l recursu interpuestu dándo-y una
calificación determinada al edificiu. Agora bien, quien agora se
riesguen les vestidures énte los medios de comunicación cola
defensa a estazón d'esti inmueble, son los primeres responsables de
la situación yá que nun sofitaron l'aprobación definitiva del
testu refundíu”.
El voceru del gobiernu local precisó
que “cualquier obra que quixera acometese nel edificiu tendrá
de rexise polo dispuesto na llei de mariñes por tar dientro del
dominiu públicu marítimu terrestre. Ye'l Gobiernu de Rajoy, y non
otros, quien realmente tien les competencies sobro esi suelu”.
Respectu al edificiu hai que recordar
que s'edificó en base a una concesión otorgada por Orde Ministerial
en 1938. Según esta concesión dexábase la construcción d'un
edificiu con destín a conserves de pexe, almacén y viviendes del
personal de la mesma. En 1941 autorizóse a Conservas Perán S. L. a
ampliar la zona d'ocupación del Dominiu Públicu Marítimu Terrestre
y la fábrica de conserves. Esta concesión foi declarada caducada yá
en 2013 por Orde Ministerial, na que se ordena a la Demarcación de
Costas del Estáu llevar a cabu l'acta de reversión al Estáu y
proceder al llevantamientu y retirada del Dominiu Públicu Marítimu
Terrestre de les obres ya instalaciones incluyíes na concesión.
El 3 de Mayu de 2015 el portal númberu
12 del citáu edificiu sufrió una quema. Arriendes de ello, la
propiedá presentó nel Conceyu un proyectu de desescombro y
baltadera selectiva qu'executaron conforme a los permisos otorgaos.
El 10 d'ochobre de 2016, dictóse
sentencia - arriendes de los recursos interpuestos polos
comenenciudos énte Mariñes- nella encamiéntase a Ordenar a la
Demarcación de Costas n'Asturies que lleve a cabu l'acta de
reversión al Estáu y, previos los trámites pertinentes, proceda al
llevantamientu y retirada del dominiu públicu marítimu-terrestre de
les obres ya instalaciones incluyíes na concesión mentada.
En cumplimientu de la sentencia
publícase apocayá nel BOPA del 9 de Marzu de 2018 el procesu
d'información pública del proyectu “Demolición de edificación
en la ensenada de Perán, T.M. de Carreño (Asturias)” con cuenta
de que pueda ser esamináu mientres un plazu de 20 díes, nes
oficines d'esta Demarcación de Costas, na Plaza d'España, núm. 3,
d'Uviéu, o na Oficina Técnica Municipal del Conceyu de Carreño, na
cai Santolaya. Esti proyectu contempla un presupuestu base de
llicitación que xube a 196.259,96 € . Esti presupuestu contempla
les baltaderes, reposición de servicios afectaos, urbanización de
la redolada, recuperación ambiental y xestión de borrafes. Pudiendo
presentase na mesma Demarcación de Costas n'Asturies y/o nel
rexistru del Conceyu de Carreño, les reclamaciones y/o suxerencies
qu'envaloren oportunes sobro'l proyectu impulsáu por Demarcación de
Costas.
“Efectivamente l'inmueble nun
s'atopa dientro del catálogu urbanísticu de Carreño y sospriende
que casi diez años dempués sía Foro quien pregunte'l porqué. La
diputada de Foro conoció perfectamente'l procedimientu
d'ellaboración del mesmu y sicasí, naquel momentu, nel que salió a
esposición pública'l catálogu urbanísticu (13 de Mayu de 2010)
nun se realizó nengún allegamientu a la propuesta del catálogu
mientres el plazu de la información pública. Procesu d'Información
que s'amplió y que duró trés meses y mediu nos que se recoyeron
allegamientos al mesmu. Nengún sobro esti edificiu. Va tener
qu'esplicanos la que foi conceyala en Carreño, a que se debe esi
repentín interés que-y vien agora sobro esta edificación” -
concluyó Gabriel Rodríguez.