La Conceyala de Cultura del Conceyu de
Carreño, Cecilia Tascón, salió al pasu de les acusaciones
realizaes apocayá por Izquierda Xunía nos medios de comunicación
en relación a la Beca Antón 2012 y esplicó que “l'oxetivu del
proyectu que ganó la Beca Antón en 2012 pa nada tenía como
finalidá crear una escultura de calter permanente, ye más en el
proyectu l'autor yá señalaba que se trata d'una instalación
temporal d'arte efímero nel esterior del Muséu, ello ye que n'el
mesmu proyectu ganador l'artista declaró qu'en nengún casu va pidir
responsabilidaes al Muséu Antón o a terceros, si les obres resulten
estropiaes o sumen”.
La conceyala aportunó na necesidá “de
faer un llamamientu al rigor político, porque acciones de falses
denuncies como ésta lo únicu que pueden consiguir ye enllordiar el
nome de la institución y poner en tela de xuiciu el llabor que se
vien faciendo ensin midir qu'esto pueda afectar a futuros patrocinios
o mezcenazgos de los proyectos del Muséu. Dende l'añu 2010, les
bases de la Beca, yá nun contemplen la realización d'una escultura
nel esterior. Poro, el proyectu Presencias, Beca nel añu 2012, nun
tenía algame nel esterior con obra dalguna”.
“El grupu d'IX formó parte d'esi
xuráu polo tanto debería de conocer les bases y el proyectu
ganador. Si surde esmolición pol estáu de dalguna obra, lo lóxico
ye qu'informaren primeramente al traviés de la Institución que
convoca la Beca y sicasí, nun contactaron col Muséu pa informase”
añedió Cecilia Tascón.
“Siempres se vela pola integridá
de la colección del Muséu Antón. Cuando'l Conceyu programó baltar
l'entorno, dende'l Muséu Antón y el Serviciu municipal de parques y
xardinos coordinaron les acciones. Foi necesariu, por casu, retirar
temporalmente'l bancu qu'ellaboró l'escultor Pablo Maojo que ta na
redolada de San Antonio y volvióse a instalar” concluyó la
conceyala de cultura.
Nun ye la Comisión d'Urbanismu la que
vela polos caltenimientos de les obres d'escultura, esiste un
Patronatu Municipal Centru d'Escultura Museo Antón que ye:
1) quien convoca les beques, col
patrociniu de EDP.
2) escueye la obra ganadora. Cabo
destacar que na selección de la obra ganadora participen – ente
otros tolos grupos políticos con representación en Carreño.
3) supervisa la realización del
proyectu ganador.
4) si se trata d'una escultura o obra
esterior supervísase'l so caltenimientu.
El Muséu Antón tien un parque
escultóricu formáu por 24 obres que supervisa y conserva. La última
restauración foi – na zona de San Antonio - la de la obra
“Damocles” de José Luis Sánchez, realizada en 2017. Obra que
fuera instalada en 1995.