Música y poesía n'asturianu


Esti xueves 8 de marzu volvieron al nuesu conceyu la música y la poesía n'asturianu de la mano del programa “Carreño, ñeru de la pluma n’asturianu”. Dos fueron les actividaes programaes dientro d'esti programa cultural.

A les 17 hores na Ilesia de Santiago de Albandi el “Ensemble de Flautes Treveseres” de la Escuela de Municipal de Música “Miguel  Barrosa” de Carreño enllenó'l templu. 

Trátase d'un grupu de moces, alumnes de Begoña Vázquez, que tán  nes aules de la Escuela de Música de Carreño o del Conservatorio d'Avilés.  De la mesma son componentes de la Banda Sinfónica Infantil y Xuvenil del Principáu d'Asturies.

Esti grupu dase cita en redol a una apasionasa llabor musical, ente l'estudiu y la diversión n'equipu que los llevó a tocar en distintos momentos dientro de l'actividá escolar musical. Complementenlo n'ocasiones y según necesidaes del repertoriu otros instrumentos como clarinetes y violoncelos que sustitúin a la flauta alto y baxu y que contribúin a dar variedá al tímbrica a les obres. El repertoriu que trabayen abarca toes les dómines de la música clásica, moderna, tradicional y popular que'l so oxetivu pedagóxicu  ye faer un percorríu históricu que-yos dexe reconocer les sos diferencies interpretatives según adquirir recursos técnicos sonoros. 

En Candás, a les 19:30 hores, celebróse'l recital llíricu musical previstu nel Muséu Antón de la mano de la escritora Lourdes Álvarez , nes que declamó dalgunes de les sos poesíes acompañada de Javier Fernández Morán al violonchelu. 

L'actu tuvo presentáu por Esther García López, escritora y presidenta de l'Asociación d'Escritores d'Asturies.

Lourdes Álvarez (1961, L'Agüeria, Mieres) ye una escritora asturiana, llicenciada en Filoloxía Hispánica. Collaboró nes revistes lliteraries Cuélebre Lliterariu, Malku, Adréi o Lletres Asturianes y foi incluyida en toles antoloxíes poétiques de los últimos años. Ye autora de los llibros de poesía: Aldabes d'el olvidu (1991), Cálices de la nueche (1992), Mares d’añil  y Poesía escoyida. 1985-1997 (1997).

Ye una de les meyores voces de la poesía asturiana. Autora de voz singular y única, la la so obra poética ta caracterizada pol so calter simbolista y pola riqueza d'imaxes astractes.

Dambes actividaes enmárquense dientro del “Progama Cultural Antón de Marirreguera, Carreño ñeru de la pluma n’asturianu”, entamáu pol Conceyu de Carreño, en collaboración cola Conseyería d'Educación y Cultura del Gobiernu del Principáu d'Asturies, l'Academia de la Llingua y Reciella.