Esti sábadu 10 de marzu, Perlora va
acoyer la quinta función de la XIII Ronda de Teatru per Carreño.
Esta actividá encuádrase dientro de la programación que dende les
distintes Conceyalíes desenvuélvese p'averar la cultura a tol
territoriu del Conceyu.
Les rises y les sorrises van anubrir el
pabellón Braulio Bustu de la mano del Grupu de Teatru San Félix de
Valdesoto, Siero, que va representar "Ello yera una vez...",
pero primero vamos poder esfrutar de les voces de los hermanos
Guillermo y Alba Bravo.
"Nun principiu, pa dicha
parroquia taba programáu qu'actuara'l Grupu de Teatru la Farola de
Xixón, pero por cuenta de un accidente d'una de les sos actrices nun
van poder tar presentes, como fuera'l so deséu. Polo que va ser el
Grupu de Valdesoto el qu'actúe nes tables del pabellón y nun
suspender la función pa que'l vecinderu pueda esfrutar d'una tarde
cultural. Deseyamos una puesta recuperación a l'actriz de La Farola
y oxalá llueu podamos tenela cola so compañía en Carreño"
señaló Cecilia Tascón- Conceyala de Cultura.
Cola dirección de Pepín García, la
compañía sierense va escenificar "Ello yera una vez..."
una obra bien dinámica que recrea la vida d'unos neños y neñes de
los años cuarenta del pasáu sieglu, los sos xuegos, les sos duldes,
les sos moliciones, los sos mieos,...
El Grupu de Teatru San Félix enmárcase
dientro de l'asociación folklórica y teatral San Félix de
Valdesoto. Naz nel añu 1979 en Siero. Fórmase en redol a 30
persones ente'l grupu d'adultos ya infantiles. El grupu de teatru
intenta reflexar nes sos obres la vida cotidiana del pueblu
asturianu, tollo regáu cola nota risible del teatru costumista.
Amás de teatru,va haber una pequeña
amuesa de cantar asturianu. Guillermo y Alba Bravo, son dos
adolescentes, promeses de la tonada, que pertenecen a l'Asociación
Cultural de la Canción Asturianu Narcea, que so la mano de José
Antonio González "Canto la vara" ensañen toles selmanes
nel Colexu Poeta Antón de Marirreguera.
Les actividaes culturales van
desenvolvese esti sábadu 10 de marzu a les 19:00 hores nel Pabellón
Braulio Bustu de Perlora. La entrada va ser llibre y gratuita hasta
que completar aforu.