El Grupu de Desenvolvimientu Rural
“Asociación pal Desenvolvimientu Integráu del Centru d'Asturies
Periurbanu (ADICAP)” entidá collaboradora del Principáu
d'Asturies y encargada de xestionar les ayudes del Programa LEADER
nos conceyos de Carreño, Corvera, Gozón y Llanera, empezó esta
mañana'l procesu de revisión de la Estratexa de Desenvolvimientu
Local Participativu (EDLP) de la contorna, documentu nel que
s'enconta anguaño la concesión d'ayudes del programa d'ayudes
LEADER pal periodu 2014-2020.
El primer grupu que trabayó
presencialmente nel salón de plenos de Carreño, col xerente,
Fernando Manuel García, na revisión de la mesma foi'l de la mesma
xunta directiva. Conforme a la metodoloxía de revisión alcordada
pol grupu y con un cuestionariu como ferramienta de trabayu pa
recoyer les aportaciones celebraron na mañana d'esti 25 d'Abril la
primer sesión de trabayu na que fueron analizando la mesma y
esbillando les propuestes de meyora, cambeos y/ o suxerencies.
Esta foi la primera d'una serie
d'actividaes programaes. Van Ser abiertes a la participación de la
ciudadanía y de los colectivos de los territorios y va dase la
opción d'impulsar una participación mista: on line al traviés de
la web del grupu http://www.adicap.com/ y presencial, con
sesiones pa revisar, valorar y afaer, si fuera necesariu, la
estratexa actual a les necesidaes de los conceyos rurales. Pretende
facilitase d'esta miente la máxima participación ya implicación
nel procesu de revisión.
La siguiente actividá va ser otra
acción, tamién presencial, una Mesa de Trabayu en Carreño prevista
pal próximu xueves 3 de mayu, a les 17 hores, nel Centru Polivalente
“La Baragaña” de Candás. El motivu d'esta revisión
debese al alcuerdu adoptáu pola Conseyería de Desenvolvimientu
Rural y Recursos Naturales, al traviés del Comité de Siguimientu
del Programa de Desenvolvimientu Rural del Principáu d'Asturies
2014-2020 axuntáu'l pasáu 21 de marzu, d'amontar los fondos Leader
n'Asturies pa los próximos años, lo que va suponer una medría de
la dotación económica cola que ADICAP cuenta anguaño p'aprobar
ayudes LEADER a proyectos empresariales, d'entidaes locales y
asociaciones. Darréu van realizase otres acciones presenciales polos
otros conceyos.
Nos próximos díes, na web del grupu
habilitaráse un cuestionariu al que va poder entrase y rellenar pa
faer llegar les aportaciones al grupu dende cualesquier de los
conceyos qu'integren esta asociación pal desenvolvimientu integráu
del centru d'Asturies periurbanu.
“Dende ADICAP y en collaboración
col Ayuntamientu de Carreño, pídese participación a les entidaes y
asociaciones empresariales del conceyu na Mesa de Trabayu del próximu
día 3 de mayu. Nella van poder plantegase propuestes de nueves
llínees d'ayuda o'l cambéu de les midíes que tán anguaño
incluyíes na estratexa y definir d'esta miente un documentu que
s'afaiga de la meyor manera posible a les necesidaes del territoriu”
– señaló l'Alcaldesa de Carreño, Amelia Fernández, presidenta
del grupu de desenvolvimientu rural comarcal.
Albandi
