El Conceyu de Carreño va reforzar la llimpieza viaria del cascu
urbanu de Candás na dómina braniza. Como vien siendo habitual y
coles mires de garantizar la llimpieza mientres los meses nos que'l
volume d'actividaes al campu y l'arribación de visitantes ye mayor,
va ameyorase'l serviciu de llimpieza viaria.
"Somos conscientes del númberu d'actividaes culturales,
deportives y d'ociu qu'acueye la villa a lo llargo del branu y de les
visites que s'averen a Carreño para esfrutar de les sableres y otros
recursos naturales, por ello, empecipiemos la contratación del
refuerzu de llimpieza viaria y la llimpieza de sableres para esti
branu. Una llicitación integral que nos dexará optimizar los
recursos n'ares d'una meyora na calidá del serviciu” - esplicó
Onésimo Velasco, conceyal d'obres del conceyu de Carreño.
"Tolos eventos que s'empecipien en xunu, tres la romería
de San Antonio, riquen del sofitu del serviciu d'obres del conceyu,
d'ende la necesidá de reforzar esti serviciu para garantizar que se
desenvuelven nos meyores condiciones y que ello nun menosprecie la
calidá de la llimpieza diaria que s'empresta'l restu del añu",
añedió'l conceyal d'obres.
"Plantegamos esta llicitación como alternativa a la
imposibilidá de contratar personal a la que nos obliga'l gobiernu
del PP poles restricciones na contratación de personal pa les
alministraciones públiques. Esperamos amás que'l restu de grupos
políticos sofiten colos sos votos esta iniciativa y dexen destinar
los recursos económicos que se precisen para llevar a bon puertu'l
contratu de refuerzu de llimpieza viaria y de sableres",
concluyó Onésimo Velasco.