El Salón de Plenos de la Casa Consistorial
presentóse esti vienres 20 d'abril la I Feria del Llibru n’Asturianu
que se va celebrar en Candás los díes 27-28-29 d'abril n'Antigua
Fábrica d'Ortiz.
El Conceyu de Carreño, en collaboración cola
Conseyería d'Educación y Cultura del Gobiernu del Principáu
d'Asturies, l'Academia de la Llingua y Reciella entamó un proyectu
cultural alredor de la figura d'Antón de Marirreguera coles mires de
la puesta en valor de la poesía y llingua asturiana al traviés del
poeta carreñense príncipe de los poetes n'asturianu y autor de la
primer obra caltenida na llingua.
Esta Feria del Llibru n’ASTURIANU enmárcase
dientro de les actividaes desenvueltes nel programa cultural Antón
de Marirreguera: “Carreño, ñeru de la pluma n’asturianu”.
Poesía, conferencies, música, teatru,… conformaron
l'estensu programa d'actividaes qu'en distintos llugares del Conceyu
viniéronse desenvolviendo a lo llargo d'esti primer cuatrimestre del
añu.
Nel actu de presentación d'esta I Feria
participaron Oihana Bonilla de Reciella, Mª Esther García López,
Presidenta de l'Asociación de Escritores d'Asturies, Amelia
Fernández, Alcaldesa de Carreño y conceyales del gobiernu local.
L'actu “Alba de les Llestres Asturianes” el
vienres 27 d'abril a les 7 hores nes Escueles de la
parroquia de Llorgozana va marcar non yá l'empiezu d'estos trés
díes que Carreño dedica a la Llingua, si non qu'a partir d'anguaño
va convertise nel empiezu oficial de la Selmana de les Lletres
Asturianes” que'l Gobiernu del Principáu d'Asturies dedíca-y.
Ocho van ser les llibreríes y les
editoriales que van participar nestos trés díes dedicaos a la
llingua asturiana. Poesía, prosa, noveles, biografíes, música
tradicional,… pero tou na llingua va ser parte del material que
podrá adquirise nos stands de “Ortiz”.
Como complementu a la Feria y alredor d'ella
programáronse una serie d'actividaes bien diverses para tolos
públicos: animación infantil, recitales de poesía, teatru,
conciertos, monologuismu,… Actividaes que non yá se desenvolverán
na Antigua Fábrica si non que'l Muséu Antón o'l Teatru Prendes van
ser otros de los escenarios d'estes actividaes, según los
establecimientos d'hostelería de la zona.
Dientro de les actividaes programaes hai que
señalar:
Animación infantil n'Antigua Fábrica d'Ortiz.
Recital de poesía al cargu de Xuan Bello nel
Muséu Antón.
Conciertu de música Barroca a cargu del alumnáu
de la Escuela de Música “Miguel Barrosa” de Carreño.
Representación de la obra “Xuan Soldáu” por
Carlos Alba “Cellero” nel Teatru Prendes.
Teatru na cai, amuesa de monologuismu nos
establecimientos collaboradores de restauración, al cargu de La
Escuela de Monologuistes de Carlos Alba “Cellero”.
Actos d'entrega del I Premiu de Poesía Antón de
Marirreguera y del I Premiu de Dichos y Creatures.
Recital de Poesía al cargu de les nueves promeses
de la poesía n'asturianu, interviniendo: Diego Solís, Irma
González-Quevedo, Aida Escuderu y Inaciu Galán, na Antigua Fábrica
d'Ortiz.
Conciertu de canta-autores asturianos Lafu
&Robeca, Rubén Bada y Leticia Gómez na Antigua Fábrica
d'Ortiz.
Amás tamién tiense la collaboración de los
establecimientos de restauración de la zona. Polo que mientres esos
díes, ocho restoranes de Candás ellaboren unos menúes especiales
para'l serviciu de cenes al preciu de 15€ por persona. Estos ocho
establecimientos son: Sidrería Casa Repinaldo; Café Chigre El
Camarote; Restorán El Embarcadero; Mesón La Espiga; Mesón Sidrería
L’Espumeru; El Llagarín de Yara y Deva; Chigre Restorán El
Náuticu; Restorán Sidrería Nordeste.
La I Feria del Llibru n’Asturianu va tener
llugar los díes 27-28-29 d'abril na Antigua Fábrica d'Ortiz
nel siguiente horariu:
Vienres: de 10:00 a 14:00 hores y de 17:00 a 20:30
hores
Sábadu: de 11:00 a 14:30 hores y de 18:00 a 22:30
hores.
Domingu: de 11:00 a 14:30 hores.