El IES de Candás, en collaboración cola Escuela de Ciclismu de Carreño entama esti xueves una “Marcha Cicloturista” ente les 11,30 y les 14 hores aprosimao.
Nella van poder participar l'alumnáu y profesoráu actual del IES, madres y padres, según persones que pertenecieron enantes al centru d'Educación Secundaria. La invitación ye estensiva al alumnáu y profesoráu de los dos colexos públicos de Candás, el C.E.I. P. San Félix y el C.E.I.P. Poeta Antón.
Ye conocida l'afición y vinculación d'esti conceyu col ciclismu. Vicente López Carril “El Candasu”, foi meyor gregariu del mundu nos años 70, compañeru indixebrable de Fonte “El Taranu” los cualos escribieron la meyor hestoria del ciclismu español de la dómina nel KAS. Esi espíritu foi recuperáu años dempués pol equipu asturianu CLAS, nos 80/90, n'él participó'l candasín Carlos Muñiz, y a él tuvieron venceyaos los carreñeses Chopi, Torrontegui, y Lolo. Según Vicente, médicu deportivu, dende l'añu 88, nel Patronatu municipal y más tarde de la Mancomunidá Cabo Peñes. El pueblu de Carreño reconoció-y la llabor de Carril dándo-y nome a les sos instalaciones deportives más preciaes. El Patronatu Deportivu del conceyu de Carreño, según el complexu polideportivu de Candás lleven el so nome nel so honor.
Güei, ye esta actividá deportiva tien el so máximu esponente na Escuela de Ciclismu de Carreño, creada nel 88. Con un claru apueste pol deporte base y con una gran capacidá organizativa con 4 carreres y la prueba San Silvestre, la cicluturista más antigua d'Asturies. Dende fai 6 años, nel conceyu, tamién se pedalia contra'l cáncer infantil. Hai una marcha de BTT, qu'entama la Escuela de Ciclismu na redolada del Monte Areo, cola collaboración de la comisión de festexos El Pegoyu de Quimarán. La recaldación de les inscripciones destínase a l'asociación Galbán de families de neños y neñes con cáncer del Principáu d'Asturies y al Institutu d'Investigación Sanitaria IIS la Fe de Valencia. Tamién hai delles peñes ciclistes locales que fomenten esta modalidá deportiva.
La comunidá educativa del conceyu nun ye axena a esta actividá y afición deportiva prueba d'ello ye qu'esta cicloturista realízaser por tercer añu consecutivu partiendo dende Candás. Coordínala el profesor Manuel Río.
L'actividá va consistir en marchar en bicicleta poles cais de Candás y hasta el pantánu de La Granda, y volver. Dichu paséu va tener un percorríu d'unos 21 km., con salida del Institutu de Candás. L'itinerariu escurre polos conceyos de Carreño y Gozón.
Como nel cursu pasáu, anguaño la marcha cicloturista estudiantil va tener un calter solidariu. Tol dineru recaldáu va ser apurríu a Cruz Roja.
Esisten dos formularios d'inscripción que pueden recoyese na conserxería del IES. Unu p'alumnáu con donativos de 1 € y otra pa madres/madres, profesoráu y persones adultes de 5 euros.
Albandi
