Esti próximu sábadu 14 d'abril la parroquia de Prevera va
llevantar el telón pa recibir una nueva xornada de la XIII Ronda de
Teatru per Carreño. Nesta ocasión la función va tener llugar en
Centru d'Iniciativa Rural a les 19 hores.
“El programa cultural XIII Ronda de Teatru ye una actividá
entamada al traviés de la Conceyalía de Cultura del Conceyu de
Carreño col fin de llevar la cultura, la cultura asturiana a tolos
rincones del Conceyu. La cultura faémosla toos y toes, y ye por ello
que'l gobiernu local esforciase por impulsala en tol territoriu. La
nuesa misión ye llevar arte y cultura, teatru, poesía, música,
esposiciones,… tamién a la zona rural” esplicó Cecilia
Tascón-Concejala de Cultura-.
Son dos les actuaciones programaes pa esi día. El Grupu de Teatru
“La Farola de Xixón” va representar la obra “La Maxa de
la Primer Vegada”, mientres Lucía Rodríguez y Sergio Méndez
van faenos cimblar coles sos voces y cola tonada.
“Nun principiu taba programada l'actuación del Grupu de
Teatru de Valdesoto.” Pero por cuenta de una indisposición médica
d'una de les actrices (de la que yá ta recuperada) de la Farola de
Xixón”, hubo qu'intercambiar les actuaciones” – esplicó
Cecilia Tascón, Conceyala de Cultura.
El Grupu de Teatru “La Farola de Xixón” cola dirección de
Christian Argúelles van representar una obra del dramaturgu
asturianu José Ramón Oliva, “La Maxa de la Primer Vez”.
La primer vegada siempres tien la so maxa, pero con una bona dosis
d'humor, un pocu d'intriga y de picardía y muncha complicidá col
públicu, el “Grupu” tien la receta máxica pa faer esfrutar al
auditoriu.
Na primavera del 2016, Chema Puerto, Christian Argüelles y José
F. Mayo plantegen crear un grupu de teatru costumbrista asturianu.
Los trés son actores consagraos nel panorama artísticu asturianu,
llevando munchos años polos escenarios d'Asturies con otros grupos.
El so oxetivu yera, a parte del esfrute personal, collaborar col
caltenimientu y l'espardimientu de daqué tan tradicional y tan de la
nuesa tierra. Con esta motivación surde na escena asturiana'l Grupu
de Teatru “La Farola de Xixón”.
Lucía Rodríguez y Sergio Méndez, son dos adolescentes de Cangas
de Narcea, que con dirección de José Antonio González “Cantu
la vara” son una de les nueves promeses del Cantar Asturianu.
Participaron nos certames y festivales que se celebren por toa
Asturies na categoría de menores de 18 o 16 años. Collechando
grandes ovaciones y aplausos. Asina Lucía alzóse col primer puestu
na categoría de menores de 16 años nel XXXVII Concursu del Cantar
Asturianu celebráu'l branu pasáu en Xixón. Tanto Llucía como
Sergio pertenecen a l'Asociación Cultural Narcea, y van tar
acompañaos a la gaita pol gaiteru Antón Medina.
La sesión teatral va ser el sábadu 14 d'abril a les 19 hores nel
Centru d'Iniciativa Rural de la parroquia de Prevera. La entrada va
ser llibre y gratuita hasta completar aforu.