Na tarde d'esti martes 24 d'abril, nel Salón d'Actos del Edificiu
Polivalente “La Baragaña” celebróse la
charra-taller “Primeros Auxilios n'Intelixencia Emocional”.
Esta actividá enmárcase dientro de los actos de la Selmana
Cultural “Sumando Capacidaes” qu'añalmente'l Colexu d'Educación
Infantil y Primaria (CEIP) Poeta Antón de Marirreguera vien
celebrando. Y que anguaño desenvuelvese a lo llargo d'esta
selmana, del llunes 23 d'abril al vienres 27 d'abril
Dende fai 5 cursos académicos el centru escolar vien realizando
un conxuntu d'actividaes coles mires de inculcar nel alumnáu un
valor añedíu: ponese nel llugar de la otra persona y conocer qu'hai
distintes maneres d'aprender y crecer. Venceyáronse diches
actividaes escontra'l respetu de la otra persona, dende la
conocencia, mirando la diversidá funcional como parte de la nuesa
sociedá, incluyendo les diferencies. Polo que la Selmana Cultura
d'esti cursu 2017-2018 ta xirando en redol a la inclusión “Sumando
Capacidaes” y llanzando una mirada distinta.
La sesión formativa impartióla la Formadora Ocupacional Carmen
de la Rosa. La cual ye esperta n'Intelixencia Emocional (IE)
pola Universidá Internacional de La Rioxa. Amás de ser presidenta
de l'Asociación de Persones con Autismu, Neños del Silenciu ADANSI.
La Intelixencia Emocional defínese como la capacidá de saber
remanar los sentimientos propios y ayenos, según l'habilidá para
poder controlalos. Un bon usu de la Intelixencia Emocional provoca
beneficios nel estáu físico y anímico de les persones, siendo un
potente indicador del nivel de prestu tanto nel trabayu como na
vida.
L'oxetivu d'esta charra-coloquiu ye conocer qué ye, para qué
sirve y como entrenar la Intelixencia Emocional. La metodoloxía va
siguir ye combinar la esposición verbal y vídeos con
dinámiques de grupu para l'analís y conocencia de la IE al traviés
de 4 bloques:
• El secretu de les emociones.
• Autoconceutu.
• Estratexes de regulación emocional.
• Automotivación y metes.
L'actu tuvo la participación del alumnáu de la Escuela Municipal
de Música “Miguel Barrosa” de Carreño. El Grupu de Cámara, de
la Escuela, 3 flautes, 1 clarinete y 2 cellos, so la dirección del
profesor Javier Fernández fueron los encargaos d'abrir la sesión
colos sos acordes.
Amás mientres el mesmu proxectóse'l curtiumetraxe tituláu
Barcos de Papel, ellaboráu por persones integrantes de l'asociación
ADANSI. Esti curtiu quedó finalista nel pasáu Festival
Internacional de Cine de Xixón.
Esta actividá entamóla'l CEIP “Poeta Antón de Marirreguera”
en collaboración cola Conceyalía d'Educación del Ayuntamientu de
Carreño.
Albandi
