El Conceyu de Carreño entama cola asociación aula de persones adultes de Candás–Encaxe de Boliyos la decimutercera edición de los Alcuentros d'Encaxeres de Boliyos “Villa de Candás”.

“Esta nueva edición del alcuentru va desenvolvese na antigua Fábrica d'Ortiz el sábadu 16 de xunu y van poder participar un total de 250 encaxeres. Amás como n'años anteriores va acutase un espaciu destináu a tiendes con productos especiales del llabor del encaxe de boliyu. Trátase d'un alcuentru na villa marinera de Candás, nel que compartir esperiencies y técniques sobre esti ancestral oficiu” – esplicó la conceyala de la área Paula Cuervo. 

Les asociaciones o grupos de persones que tean interesaes en participar nel alcuentru tendrán de formalizar la inscripción na Oficina de Turismu de Carreño n'horariu de llunes a domingu de 10 a 14 hores y de 16:30 a 20 hores, al traviés de corréu electrónicu (turismo@ayto-carreno.es) o al traviés de corréu postal Ayuntamiento de Carreño (Ref. Encuentro de Encajeras) Oficina Turismo Carreño Telf.985884888 C/ Santa Eulalia, 1 y 3 Candás 33430 CARREÑO (ASTURIAS). El plazu d'inscripción remata'l 24 de Mayu.

Les persones comenenciudes en vender los sos productos artesanales, por cuenta de la celebración d'esti alcuentru, van tener a la so disposición sitio pal allugamientu del puestu, previa solicitú d'el  mesmu. El preciu pal allugamientu del puestu va ser de 10 € metro. El plazu d'inscripción remata'l 31 de Mayu.

Les fueyes d'inscripción tanto p'asociaciones o grupos de persones comenenciudes en participar según pa les tiendes que vendan productos artesanales pueden descargase na páxina web del Conceyu de Carreño ( @www.ayto-carreno.es).

“Dende l'área de Turismu de Carreño suxurimos a toles persones comenenciudes que formalicen la so inscripción lo antes posible, yá que tan solo se dispón de 250 places. Facilitaríanos enforma a la organización del eventu si la inscripción se fae por grupos o asociación, y non de forma individual. Pa cualquier consulta o aclaración al respective, nun duldar en ponese en contactu cola oficina de Turismu n'horariu de llunes a domingu de 10 a 14 hores y de 16:30 a 20 hores” –concluyó la edil.