L'Alcalde de Benidorm, el popular Antonio Pérez, acompañáu del conceyal Jesús Carrobles y representantes de la Casa d'Asturies benidormí, visitaron Candás y caltuvieron un alcuentru de trabayu col equipu de gobiernu de Carreño. L'oxetivu del alcuentru, según esplicó l'Alcaldesa foi "consolidar el nuesu conceyu como destín turísticu y establecer asina intercambios de promoción turística con otres localidaes". 

Trátase de desenvolver un trabayu "en clave d'intercambiu de promoción turística", esto ye, "impulsar pal añu que vien una promoción cruciada y conxunta pa intercambiar turistes y realizar paquetes turísticos conxuntos".

“Queda dir perfilando cómo faer les promociones en dambos conceyos de manera que nuesa próxima xera sía dir dándo-yos forma a lo faláu y contactar col empresariáu turísticu porque, a última hora, trátase de poner en marcha iniciatives públicu-privaes que sumen. Equí les empreses d'esti sector tienen enforma que dicir" – esplicó l'Alcaldesa.

Benidorm ye unu de los destinos turísticos más importantes y conocíos de España y de too el Mediterráneu. La Casa d'Asturies en Benidorm celebra, ente otres la festividá del Día d'Asturies, al traviés de la mesma pretenden articulase intercambios d'acciones de promoción sociocultural con colectivos locales y empreses artesanes.

“Cola cuenta de favorecer l'intercambiu de la cultura, l'artesanía, la música y la gastronomía local embaraxamos el desenvolvimientu de distintes acciones de promoción. La directiva de la Casa d'Asturies y Fila Ástures Benidorm ta bien ilusionada y tienen el deséu de qu'esti primer alcuentru ente los consistorios tenga frutu y conviértase nuna realidá de futuru. Ensin dulda, va ser un motivu d'allegría pa los asturianos y les asturianes residentes nesta ciudá mediterránea, de la que va favorecer que nos conozan n'Alicante. Un intercambiu positivo y equilibrao d'esperiencies ente residentes y visitantes , al traviés de conexones significatives coles tradiciones culturales, como les habaneres que d'antiguo se cantaben nes fábriques de Candás, y con dellos productos gastronómicos, ente otros, la sidra de Carreño y los nuesos conocíos duces, les marañueles con marca de garantía Alimento del paraíso” – concluyó Amelia Fernández.

Na semeya, d'esquierda a derecha, Francisco Javier Alonso, Vicepresidente de la Casa d'Asturies en Benidorm, al so llau, Ramón Carrillo, Presidente de dicha entidá, el conceyal Gabriel Rodríguez, l'Alcaldesa de Carreño, l'Alcalde de Benidorm, el Conceyal de Festexos d'esi conceyu alicantín y la Secretaria d'Organización de la Casa d'Asturies en Benidorm.