Nel marcu del conveniu de collaboración robláu ente'l Conceyu de
Carreño y el Colexu de Veterinarios d'Asturies, “vamos
celebrar una xornada informativa'l próximu mes de xunu sobre los
requisitos llegales tocantes a identificación y cuidos que tienen de
tener los perros. Coles mesmes nesta xunta vamos empecipiar la
valoración d'una propuesta sobre la instalación d'un parque canín
en Candás y pa lo cual queremos consultar col vecinderu, pos
son ellos, como propietarios d'estos animales los que van poder
apurrir les sos idees”, esplicó Gabriel Rodríguez, Conceyal
de Mediuambiente.
Nel conceyu de Carreño, na actualidá hai censaos 1.944 perros,
d'ellos 51 son de raza potencialmente peligrosa partíos poles
distintes parroquies. Nesti casu ye en Candás, la localidá onde
s'atropa'l mayor númberu de los mesmos siendo 25 los censaos
nesti momentu siguiéndo-y Ambás (6), Albandi (4), Perlora (4),
Quimarán (3), Tamón (2) y Carrió, LLorgozana y El Pieloro con 1
animal perteneciente a estes races en caúna d'elles.
“Estos datos fuéronnos facilitaos pol Colexu de Veterinariu
d'Asturies na última xunta celebrada de siguimientu del conveniu
ente dambes organizaciones. Alcuentru de trabayu que remató cola
entrega de dos llectores de chips d'última xeneración por que los
nuesos axentes de policía local puedan realizar el so trabayu nes
meyores condiciones cuando sían riquíos pa la identificación de
dalgún animal errante”, añedió'l Conceyal de Mediuambiente.
A pesar d'esti númberu de perros censáu siguen apaeciendo nel
conceyu bastantes perros ensin identificación, “Por esti motivu
tenemos previstu, pasáu'l branu, fíxose una campaña d'allugamientu
del chip nes distintes parroquies pa poder facilitar a aquellos
propietarios la identificación de los animales”, concluyó'l
conceyal.
Na imaxe: Gabriel Rodríguez, edil, Amelia Fernández,
Alcaldesa de Carreño, Armando Solís Vázquez de Prada, Presidente
del colexu de veterinarios y José Ramón Álvarez, axente de policía
local del Conceyu de Carreño.