Les entidaes ensin ánimu
d'arriquecimientu de Carreño avancen na tramitación electrónica,
formándose en collaboración col Conceyu, pa poder afaese a les
esixencies llegales.
Nes dos primeres xornaes formatives
impulsaes pol consistoriu, nel Centru de Dinamización Tecnolóxica
Local, participaron 26 asociaciones del conceyu.
Nestes acciones formatives gratuites
familiarizóse-yos, a les directives del movimientu
asociativu, cola realización de trámites al traviés de los
nuevos servicios telemáticos qu'ufierta la nueva web municipal.
Tamién se trabayó'l nuevu marcu regulatoriu estatal d'obligáu
cumplimientu. La Llei 39/2015, de 1 d'ochobre, del Procedimientu
Alministrativu Común de les Alministraciones Públiques, establez la
obligatoriedá de les persones xurídiques de rellacionase al
traviés de medios electrónicos coles Alministraciones Públiques pa
la realización de cualquier trámite d'un procedimientu
alministrativu. D'ende la importancia de formar a les persones que
tán al mandu de les asociaciones locales cola cuenta de qu'adquieran
les competencies necesaries p'afaese al nuevu marcu llegal
qu'implica'l tresformamientu nes tramitaciones con toles
alministraciones.
La parte más práctica y que más
ayuda a les entidaes ye conocer los métodos d'identificación al
traviés de medios telemáticos, como'l certificáu dixital del
representante de persona xurídica, según los trámites necesarios
pal so llogru per parte de les asociaciones del conceyu.
Dende'l CDTL C@rreño Digit@l
facilítase a les asociaciones municipales la documentación
necesaria pal llogru del certificáu dixital. Ponse a
disposición de diches asociaciones un ordenador del centru municipal
pa la realización de los trámites necesarios, nun primer
momentu pa esi llogru y más palantre pa la realización de trámites
por medios electrónicos coles distintes alministraciones, tanto
local como autonómica o estatal.